මා අප්පච්චී කවදත් ඇමතුවේ තාත්තා කියාය...... ඒත් මා කැමති වුනේ අප්පච්චී කියන්නටය...... කොහොම ඇමතුවත් අප්පච්චීගෙන් මා දුටු ආදරය කවමදාවත් වෙනස් වුනේ නැත. වෙනස් වන්නේද නැත......
සාමාන්‍යයෙන් අප්පච්චීලා දැඩිය...... ආදරය වැඩිය පෙන්වන්නේ නැත..... නමුත් මගේ අප්පච්චී කවමදාවත් මට ආදරය පෙන්වන්නට පැකිළුනේ නැත.... පුංචි සන්දියේ පටන් අප්පච්චීත්, මාත් අතර වූයේ බොහෝ කිට්ටු බැඳීමකි..... මට පොත් කියවන්නට පුරුදු කලේ අප්පච්චීය. ජීවිතය දෙස උපේක්ෂාවෙන් බලන්නට, නිවැරදි දේ වෙනුවෙන් කතා කරන්නට බිය නොවන්නට ඉගැන්වූයේ අප්පච්චීය.... හැමදාමත් අම්මාට වඩා මා, මගේ ආකල්ප තේරුම් ගත්තේ ඔහුය.....
පුංචි කාලේ පටන් මා මගේ හොර වැඩ, දඟ වැඩ වලට බොහෝ විට හවුල් කර ගත්තේ ඔහුය.... අප්පච්චීගේ හුරතලය මා නරක් කරන බව පවසන අම්මාගේ ඇනුම් පද වලට අප්පච්චී කවදාවත්ම සැලෙනු මා දැක නැත.... කොහොමත් කෙල්ලන් වැඩිපුර ආදරේත් තාත්තාටය.....
ඉස්සර මට උණ හැදුනු විට මා ලඟට වීගෙන කතන්දර කියන්නේ අප්පච්චීය..... ඔහුගෙන් එකම කතාන්දරය කොපමණ වාරයක් ඇසූවද මට එපා වන්නේ නැත..... ඒ දවස් වල මා අසන සැරයක් පාසා එකම දේ කියන්නට අප්පච්චීට කොපමණ ඉවසීමක් තිබෙන්නට ඇත්දැයි දැන් මට සිතේ..... හැමදාමත් මා බත් කවාගන්නට කැමති වුනේද අප්පච්චීගෙනි.....
අප්පච්චී කවදත් මගේ ඇසේ කඳුලක් දැකීමට කැමති වුනේ නැත.... ඔහුගේ ආදරය කොන්දේසි විරහිත, උතුම් ආදරයකි..... සමහර වෙලාවට අම්මලාගේ ආදරය ආත්මාර්ථකාමීය..... නමුත් අප්පච්චීගේ ආදරය කවමදාවත් එසේ වන්නේ නැත......
මා ජීවිතය දැක්කේ ඔහුගේ දෑසිනි..... බලාපොරොත්තු තබා ගත යුත්තේ ඒවා කැඩී බිඳී යාමෙන් වන වේදනාව දරා ගත හැකි නම් පමණකැයි ඔහු නිතර කියනවා මට මතකය..... අප්පච්චීගෙන් මා උගත් දේ බොහෝය...... පුංචි සන්දියේ සිටම කවුරුන් හෝ මගෙන් මා වැඩිපුරම ආදරේ කාටදැයි ඇසූ විට මා උත්තර දුන්නේ අම්මාටයි, තාත්තාටයි දෙන්නටම කියාය..... නමුත් අප්පච්චීට මා දශමයක් හෝ ආදරේ වැඩිය.....
තවමත් මා කොලඹ සිට ගෙදර යන විට අප්පච්චී මා යන මගට පැමිණ හිඳියි....... කොතරම් එපා කීවද , ඔහු මා අත රැඳි එක බෑගයක් හෝ ඔහු අතට නොගෙන නොනවතියි.....
මිනිසෙකුට ගැහැණුන් දෙදෙනෙකුට මෙතරම් ආදරය කල හැකි දැයි මට වැටහුනේ, අප්පච්චී අම්මාටත් මටත් දක්වන අසීමිත ආදරය නිසාය..... අප්පච්චී අම්මාට වඩා මටයි ආදරේ...... මං ඉස්සර අම්මාට එහෙම කියනවා මතකය..... නමුත් අප්පච්චී අපි දෙදෙනාටම එක ලෙස ආදරේ බව දැන් මම දනිමි...... සමහර විට ඔහු මට වඩා අම්මාට ආදරේ වන්නට ඇත...... විය යුත්තේ එයය......
තවමත් ඉස්සර වගේම අප්පච්චී ලඟට වීගෙන හිඳින්නට ඇත්නම් කියා මට සිතෙන වාර අනන්තය...... පුංචි කාලය කොහොමත් හොඳය....... අප්පච්චී සමඟ පුංචි කාලය කොහොමත්ම හොඳය.........
